Señalá, i kiko awor?
Kon pa usa e Tarheta di Señal?
E tarheta di señal ta un hèrmènt práktiko pa profeshonalnan ku ke rekonosé señalnan di violensia doméstiko i maltrato di mucha, i ke krea posibilidatnan pa papia di esakinan. E tarheta ta yuda bo pa tene un bista amplio; no solamente di un persona òf situashon so, sino di henter e imágen. Tuma tur señal na serio, basa bo mes riba loke bo ta opservá, i papia tokante di bo opservashonnan ku bo koleganan.
Paga tinu: señalnan riba nan mes nunka ta prueba. Nan por indiká ku tin violensia, pero no nesesariamente mester ta asina. Sea kouteloso i drenta den kòmbersashon – ku aktitut habrí i sin huzga. Violensia sa ta resíproko; un hende por ta tantu víktima komo outor. P’esei, tuma bon nota di e ròlnan ku hende tin; esakinan por varia.
Bo por yena e tarheta digitalmente, i warda esaki komo PDF. E PDF aki ta yuda bo pa bai dor di e pasonan di e Kódigo di Protekshon Violensia Doméstiko i Maltrato di Mucha.
Usa e tarheta di señal komo punto di inisio pa mas akshon. Sea alerta, traha huntu i aktuá ku koutela.
Tepnan ora bo señalá
- Basa bo mes riba loke bo ta opservá: Kiko bo ta mira? Kiko bo ta tende?
- Hasi preguntanan habrí, por ehèmpel: “Kon ta bayendo na kas?” òf “Kiko ta pasa ora boso tin diskushon?”
- Usa lenguahe komprendibel: konektá ku e mundu di e hende, evitá usa vokabulario spesialisá.
- Dokumentá neutralmente i faktualmente; deskribí komportashon sin huzga, supstansiá ekspreshonnan ku echonan.
- Traha huntu; komprobá bo opservashonnan, sea alerta i aktuá ku koutela.
Señalá, i kiko awor?
Violensia den relashonnan hopi biaha ta skondí. Señalnan no semper ta visibel òf fásil pa rekonosé. Víktimanan i outornan por sinti bèrgwensa òf tin miedu di e konsekuensianan, loke ta pone ku e violensia ta keda skondí. Esaki ta pone ku señalá ta kompliká, i ta rekerí sensitividat, konosementu i abilidatnan.
Hopi biaha, profeshonalnan ta sinti inkapasidat pa aktua; dudanan tokante di e balorashon di e situashon, miedu di empeorá e situashon, òf falta di konfiansa den nan mes abilidatnan. Frekuentemente, señalá ta kuminsá a base di sospechonan, i por kompará e proseso ku solushon di un pùzel. Konsiderá e echonan, deklarashonnan, konteksto i emoshonnan propio. Un pregunta simpel manera “Kon ta bayendo na kas?” ya kaba por provoká hopi emoshon.
Usa lenguahe ku ta konektá ku e mundu di e hende i mucha. Evitá idioma sistemátiko. Dokumentá komportashon faktualmente i neutralmente, i supstansiá alegashonnan ku opservashonnan. Reportahe deskuidadoso por perhudiká e proseso di asistensia.
E tarheta di señal renobá (2025) ta yuda profeshonalnan pa sistemátikamente dediká atenshon na loke nan a mira, skucha òf sinti. Konektando e persepshonnan na señalnan i faktornan di riesgo, ta krea un mihó bista riba e situashon. E tarheta ta mará na e Kódigo di Protekshon, i ta guia e usuarionan paso pa paso dor di e kuadro di balorashon: abo mes ta drenta den kòmbersashon, bo ta pidi yudansa òf bo ta notifiká?
E tarheta di señal ta ofresé struktura, ta redusí sintimentunan di inkapasidat i ta oumentá e chèns ku víktimanan ta haña yudansa adekuá na tempu. E ta yuda bo pa no solamente konsiderá e hematomanan òf kehonan di tenshon, sino tambe e hende tras di e señal – ku su konteksto i vulnerabilidatnan úniko.
Kódigo di Protekshon
Pa mas informashon tokante di e diferente pasonan, konsultá www.nomasnomore.nl i puntra pa e protokòl pa Kódigo di Protekshon Violensia Doméstiko i Maltrato di Mucha den bo mes organisashon.
Paso 1: Identifiká e señalnan
Identifiká de señalnan ku ta konfirmá òf desmentí un sospecho di violensia doméstiko òf maltrato di mucha, i registrá esakinan.
Posibelmente, tin tópikonan ku no ta riba e tarheta, pero ku sí preokupá bo. Bo por inkluí esakinan den bo desishon pa notifiká òf keda sin notifiká. Nos ta konsehá bo pa ta kouteloso ku señalnan ku abo mes no a opservá, i kaminda ta posibel, pa stimulá e personanan aki pa nan mes duna e pasonan di e Kódigo di Protekshon òf pa tuma kontakto ku e Instansia di Konseho i Notifikashon. Hasi e chèk di mucha òf chèk di kuido informal ora bo traha ku adolesente, adulto i/òf hende grandi vulnerabel ku ta den un situashon (médiko) ku por kousa (hopi) daño na yunan menor di edat òf parehanan.
Chèk di mucha
Mester hasi un chèk di mucha ora un kliente adulto òf adolesente ta den un situashon (médiko) ku por kousa dañonan (serio) na mucha menor di edat. E chèk di mucha ta nifiká ku bo ta verifiká serka sierto gruponan di adulto si nan ta kuida mucha menor di edat, i si muchanan ta krese einan di manera sigur. Pensa por ehèmpel riba klientenan ku problema síkiko serio, adikshon na droga òf alkohòl òf ku un pareha violento. Serka e gruponan aki, verifiká tambe si nan ta na estado. I serka klientenan adolesente ku problemanan asina, bo ta verifiká si nan tin ruman menor di edat ku ta biba ku nan den kas.
Paso 2: Konsulta ku koleganan
Deliberá e señalnan ku un kolega eksperto òf den un reunion di tim. Si mester, pidi konseho di e Instansia di Konseho i Notifikashon. Registrá e resultadonan di e konsulta ku koleganan i/òf e konseho duná den e dosié di kliente. Skirbi ku ken bo a papia, kiko boso a papia i ki dia.
Paso 3: Kòmbersashon ku e kliente
Deliberá e señalnan ku e kliente. Si bo mester di apoyo pa prepará òf hiba e kòmbersashon ku e kliente, konsultá ku un kolega eksperto i/òf e instansia di konseho i notifikashon.
- Splika e kliente kiko e meta di e kòmbersashon ta.
- Deskribí e echonan ku bo a determiná, i e opservashonnan ku bo a hasi.
- Invitá e kliente pa duna un reakshon riba esaki;
- No bini ku un interpretashon di loke bo a mira, skucha i persibí, si mester, promé ku bo a tende e reakshon aki.
Paso 4: Konsiderashon di e violensia pa medio di e kuadro di balorashon
A base di e señalnan, e konsehonan ku bo a haña i e kòmbersashon ku e kliente, konsiderá e naturalesa i e seriedat di e violensia doméstiko i/òf e maltrato di mucha, pa medio di e kuadro di evaluashon. Ademas, konsiderá e naturalesa i e seriedat di e violensia doméstiko i e maltrato di mucha. Bo por hasi uso di un instrumento di taksashon di riesgo si den bo organisashon tin un instrumento asina disponibel.
Inventarisá
- Mi tin tur informashon relevante?
- Mi a papia ku tur persona involukrá, inkluyendo mucha?
- Mi a duna tur paso?
- Mi a registrá tur informashon den e dosié?
Evaluá
- Ku guia di e kuadro di evaluashon, a base di tur informashon i kòmbersashonnan, evaluá e riesgo riba insiguridat i e seriedat di e insiguridat.
- Den kasonan di duda, (bolbe) konsultá e Instansia di Konseho i Notifikashon (HGKM)
5. Disidí: ofresé/organisá yudansa òf notifiká
Por ofresé yudansa outónomo si notifiká ora ku abo komo profeshonal:
- ta kapas pa ofresé òf organisá yudansa efikas i adekuá;
- e kliente i e sobrá personanan involukrá ta deseá e yudansa aki; i
- esun ku ta bai ofresé yudansa ta kapas pa sigui si e yudansa ofresé ta kondusí na seguridat duradero.
Ta konsehabel pa notifiká ora ku:
- e kliente i/òf otro personanan involukrá no ta deseá e yudansa ku bo ta ofresé òf organisá;
- e yudansa (aktual) no ta duna sufisiente garantia pa e seguridat di e kliente i e famia, òf si debí na e naturalesa i seriedat di e señalnan i/òf e resultado di e chèk di mucha bo no ta kapas pa ofresé yudansa adekuá i efikas ku lo kondusí na seguridat duradero.
Informá e kliente di e notifikashon si bo no a inform’é tokante di esaki anteriormente. Aki tambe ta konta ku solamente bo por keda sin informá e kliente si tin indikashonnan konkreto ku esaki por kondusí na riesgonan di seguridat pa e kliente, su famia òf abo mes. Por ehèmpel si tin señalnan ku e kliente lo bira ainda mas violento pa ku su víktima ora e haña sa ku e víktima a papia ku profeshonalnan di asistensia, òf si a base di eksperensianan anterior ku e kliente e profeshonal tin miedu ku e kliente lo usa violensia kontra di dje.
Kontenido di e notifikashon
- e echonan ku ta duna lugá na e notifikashon;
- e reakshon di e kliente riba e echonan aki;
- si no tabata tin kontakto ku e kliente: dikon esaki no tabata posibel;
- kiko esun ku ta notifiká ta spera di logra ku e notifikashon